«Նշեցիք, որ պլանավորվում էր նաև քաղաքացիական անձանց զրկել կյանքից, չնշեցիք պաշտոնատար անձանց, ուզում եմ հասկանալ քաղաքական անձ նշանակում է ֆիզիկական անձ, ի հակադրություն պաշտոնատար անձի, ի՞նչ է նշանակում քաղաքացիական անձանց զրկել կյանքից, ու՞մ մասնավորապես, և երկրորդ հարցը, այս գործողությունները պլանավորվել են կատարվել անցած տարի սեպտեմբերից մինչև այս տարվա գարուն, և ասացիք կանխվել են դատախազության կողմից, այսինքն դատախազությունը համոզմունք ունի, որ այդ գործողությունները ոչ թե ինքնտապալվեն են, այլ կանխվել են։ Կա՞ որևէ հուշում գործի մեջ, թե ինչ առիթի էին սպասում այդ գործող անձինք իրենց գործողությունները ի կատար ածելու համար, այսինքն՝ ի՞նչը պետք է հանդիսանար խթանը, որպեսզի այդ զանազան քննարկվող սցենարները գործարկվեին»,- Ազգային ժողովի արտահերթ նիստի ժամանակ, որտեղ քննարկվում էր պատգամավոր Արթուր Սարգսյանի նկատմամբ հանրային քրեական հետապնդում հարուցելու հարցը, «Քաղաքացիական պայմանագիր» խմբակցության պատգամավոր Մարիա Կարապետյանը հարց է ուղղել ՀՀ գլխավոր դատախազին:
Աննա Վարդապետյանն արձագանքեց.«Մենք խոսում ենք սեպտեմբերին պլանավորվող գործողության մասին, որն անընդհատ փորձում է արվում ներկայացնել նախկին սեպտեմբերին, որը տապալվել է: Զրույցները հստակ ցույց են տալիս, որ մասնակիցները փնտրում են օր կամ խորհրդանշական մի իրադարձություն, որը հնարավորություն կտա, ինչպես իրենք են ասում՝ ալիքը բռնել, որ մարդիկ հավատան ու գան: Շատ հաճախ դա կապվում է եկեղեցական տոնի հետ՝ Խաչվերաց տոնի հետ կամ անկախության տոնի հետ»:
«Նաև մի տողով խոսվում է բարձրաստիճան պաշտոնատար անձանց սպանության համար պատասխանատվության մասին, խմբի մասնակիցներից մեկը զրույցի մեջ մի քանի անգամ հարցնում է՝ ի՞նչ կլինի եթե այս անձանցից մեկին սպանեմ, ասում են ինչ կլինի, ասում է՝ իսկ եթե երեքը մի տեղում լինեն: Քաղաքացիական անձանց մասով բավականին շատ շրջանառվեց մի խոակցություն՝ «գյուլլելու» հետ կապված, փորձեցին տարբեր կերպ մեկնաբանել: Խոսքը վերաբերում էր նրան, որ այդ անկարգությունների ժամանակ կարող են լինել նաև քաղաքացիական անձանց հետ կապված մահեր»,- նշեց նա:
Կարապետյանի հարցին, թե ինչ դեր էր վերագրվում ընդդիմադիր խմբակցություններին, Վարդապետյանն արձագանքեց.«Խոսակցություններ էին գնում, որ պետք է ստեղծեն իրավիճակ, որ ստիպված առաջադրեն կոնսենսուսային թեկնածու և ընդդիմադիր պատգամավորները պետք է անպայման ներկա լինեն, որ կարողանան ԱԺ-ում ըստ իրենց մանդատի իրականացնել այդ գործողությունները: Պլանավորման մեջ հստակ կա Դաշնակցության պատգամավորների մասնակցության ներառումը որոշակի քննարկումներ գնում են այն ուղղությամբ, որ պատգամավորներն անպայման գան ԱԺ, ենթադրում են ինչ-որ նախկին փորձառություններ կան, երբ չեն կարողացել համոզել գալ, հատկապես Գալստանյանի կողմից ֆիքսվում է, որ պիտի լինեն ԱԺ-ում, խոսակցություններ կան, որոնք նաև պառլամենտական գործընթացներ են ներառում իրենց ծրագրերի մեջ»:
