Թուրքիայի Օրդու նահանգի Ալթընօրդու շրջանում 1 օրվա տարբերությամբ մահացել են տեղի վերջին հայերից բժիշկ Տիգրան Թորամանը (90տ.) և նրա քույրը դեղագործ Արտեմ Թորամանը (86տ.):
Շրջանի Զաֆերիմիլլի թաղամասը, որտեղ բնակվում էին Թորամանները (Թորամանյան) , ըստ թուրքական «Takvim» լրատվականի տվյալների, ժամանակին բնակեցված է եղել ավելի քան 12 հազար հայերով և կոչվել է հայկական թաղամաս:
Նշվում է, որ հանգուցյալները իրենց ողջ կյանքում, բացի Ստամբուլում բժշկական կրթություն ստանալու տարիներից, ապրել են Ալթընօրդուում և մասնագիտության բերումով շփվել շրջանի բնակչության հետ՝ նրանցից շատերին օգնելով առանց դրամական փոխհատուցման: Դոկտոր Տիգրան Թորամանը 25 տարի եղել է նաև «Օրդուսփոր» ակումբի բժիշկը՝ ըստ թուրքական աղբյուրի այդ պարտականությունները կատարելով բոլորովին անվճար:
Ermenihaber-ի փոխանցմամբ՝ շրջանում եկեղեցի ու հոգևորական չլինելու պատճառով երկուսի հոգեհանգստի արարողություններն էլ կատարվել են թաղմասի մզկիթում, իսկ հուղարկավորության արարողությունը կատարվել է մուսուլման հոգևորականի մասնակցությամբ:
Ավելի ուշ հայտարարություն է տարածել նաև Պոլսի հայոց պատրիարքարանը՝ նշելով, որ իրենց տեղեկություն չի տրամադրվել հայ քաղաքացիների մահվան վերաբերյալ և միայն մամուլից են իմացել կատարվածի մասին:
