Երևանում ընթացող ծանրամարտի Եվրոպայի առաջնությունում այսօր մրցահարթակ դուրս եկան 96 քաշային կարգի տղամարդիկ, որտեղ Հայաստանի ներկայացուցիչներից Դավիթ Հովհաննիսյանը երկրորդ տարին անընդմեջ դարձավ Եվրոպայի չեմպիոն: Արա Աղանյանն էլ դարձավ փոխչեմպիոն, ինչպես նախորդ տարի:
Պոկում վարժությունում Հովհաննիսյանն ու Աղանյանը առաջին մոտեցմամբ բարձրացրին 165 կգ: Երկրորդ մոտեցման համար հայ ծանրորդները պատվիրել էին 170 կգ. Դավիթ Հովհաննիսյանը հաջողությամբ պոկեց այն, իսկ Արա Աղանյանը չկարողացավ: Վերջինս չկարողացավ բարձրացնել նաև երրորդ մոտեցման համար պատվիրած 171 կիլոգրամը: Իսկ Դավիթ Հովհաննիսյանը երրորդ փորձից հաջողությամբ պոկեց նաև 172-ը՝ նվաճելով պոկում վարժության ոսկին՝ 2 կգ գերազանցելով երկրորդ տեղը զբաղեցրած թուրք ծանրորդին: Պոկում վարժությունում Արա Աղանյանը երրորդն էր:
Հրում վարժությունում Արա Աղանյանը սկսեց 199 կիլոգրամից և հաջողությամբ հրեց: Դավիթ Հովհաննիսյանն էլ բարձրացրեց 200 կգ: Երկրորդ մոտեցմամբ Հովհաննիսյանը բարձրացրեց նաև 205 կգ: Այս քաշը բարձրացնելուց հետո Աղանյանը հրաժարվեց իր երկու մոտեցումներից, Հովհաննիսյանն էլ՝ վերջին մոտեցումից:
Արդյունքում, երկամարտի 377 կգ արդյունքով Դավիթ Հովհաննիսյանը հռչակվեց Եվրոպայի չեմպիոն: Արա Աղանյանն էլ 364 կգ արդյունքով դարձավ Եվրոպայի փոխչեմպիոն:
